Nitish Setu bridge ka naam rakhe jaane ke baad Bihar ki rajneeti mein tez halchal shuru ho gayi hai. Patna ke Kachchi Dargah se Vaishali ke Raghopur aur Bidupur tak banaye gaye sixlane bridge ka naam purva mukhyamantri Nitish Kumar ke naam par ‘Nitish Setu’ rakhe jaane par virodhi dalaon ne bada hamla bola hai. Neta Pratipaksh Tejashwi Yadav ne is mudde par sarkar ko gherte hue bada bayan diya hai.
Tejashwi Yadav ka teekha tanz
Patna mein media se baat karte hue Tejashwi Yadav ne kaha ki kisi bhi vyakti ya neta ke naam par pulon ka naamkaran ya murtiyan tab lagayi jaati hain jab woh hamare beech nahi rehte hain. Lekin yahan Nitish Kumar ke jivit rehte hi unke naam par pul ka naamkaran kar diya gaya hai. Unhone tanz kaste hue kaha ki isse aisa lagta hai mano sarkar yeh sandesh dena chahti ho ki rajneetik roop se ab Nitish Kumar ka daur khatam ho chuka hai.
Rohini Acharya ki alag mang
Dusri taraf, RJD supremo Lalu Prasad Yadav ki beti aur Tejashwi ki bahan Rohini Acharya ne bhi social media par is faisle par apatti jataayi hai. Unka kehna hai ki is pul ka naam unke pita Lalu Prasad Yadav ke naam par ya fir ‘Samajik Nyay Setu’ rakha jana chahiye tha. Unhone ise rajneetik srey lene ka prayas bataya hai.
Sarkar aur JDU ka palatwar
Bihar sarkar ke mukhyamantri Samrat Choudhary ne ghoshna ki thi ki 21 November ko Pradhanmantri Narendra Modi is sixlane bridge ka vidivat lokarpan karenge. Yah pariyojana purva mukhyamantri Nitish Kumar ke dream projects mein shamil rahi hai. Is faisle ke baad JDU mein khushi ki lehar hai aur up-mukhyamantri Vijay Choudhary ne kaha ki Bihar ke nav-nirman mein Nitish Kumar ka yogdan sadaiv yaad rakha jayega.
‘Nitish Setu’ ke naamkaran ko lekar Bihar ki rajneeti mein lagatar bayanbaazi jaari hai, jahan ek taraf NDA isse vikas aur samman se jod raha hai, wahin RJD ispar sawal khade kar rahi hai.
Aane wale dino mein is pul ke udghatan aur iske naamkaran ko lekar bihar ki rajneeti mein aur tej takrar dekhne ko mil sakti hai, jiska asar aane wale rajneetik samikaranon par bhi padega.
